સાબિત કરીને શું કરું
મારી આગળ મારી જાતને સત્ય સાબિત કરીને શું કરું? જગત છે મિથ્યા તો બ્રહ્મને સત્ય સાબિત કરીને શું કરું દુનિયાને ખબર જ છે દુષ્ટો કોણ છે,ક્યાં અને કેટલા છે બલિનો બકરો બનીને, બદનામોને સાબિત કરીને શું કરું પ્રત્યેક પાંડવ હણી શકે છે,કૌરવ સેના સમગ્રને એક ઝાટકે પણ સાંભળનારા શકુનિઓ જ છે, સાબિત કરીને શું કરું અસત્યની ગતિથી તો જુઓ પ્રકાશ પણ શરમાય છે હવે ત્યારે સત્યના કીડીવેગને પછી સારો સાબિત કરીને શું કરું અજ્ઞાન,અંધકાર,અલંકાર ને અનાવૃત્તતાના રાસડા ચારેકોર ત્યાં સંવેદનાની આ ગરબીને હું નૃત્ય સાબિત કરીને શું કરું કર્દમ મોદી પાટણ